Erfalasorput

Nalunngiliuk:

Kalaallit erfalasortaarnissaanut siunnersuut siulleq 1973-imi saqqummiunneqartoq?

1980-imi Namminersornerullutik Oqartussat erfalasussamut unammisitsimmata siunnersuutit 555-it nassiunneqarput, ajugaasussarli isumaqatigiissutigineqanngitsoortoq?

1985-imi ullorsiornitsinni Erfalasorput atoqqaarfissiorneqartoq?

Thue Christiansen –Erfalasutsinnut titartaasuusoq – allap sanaavanik issuaasimasutut unnerluutigisaasimasoq?

Erfalasutsinni qalipaat aapparlaartoq pisortatigoortumik ateqartoq pantone 032?

Erfalasorput aamma taaneqartartoq Aappalaartoq?:

Thue Christiansen -Kalaallit erfalasuannik pilersitsisoq.

Thue Christiansen 1940-mi Marmorilimmi Uummannap eqqaaniittumi inunngorpoq.

Ilinniareernerup kingorna ukiorpaalunni ilinniartitsisutut sulivoq. 1979-imiit 1984-imut Kultureqarnermut Naalakkersuisuuvoq. Aamma tusagassiortutut, kultureqarnermut pisortaqarfimmi allaffimmi pisortatut taassumallu iluani aamma kalaallit Eqqumiitsuliaat siuarsarniarlugit siunnersortaasimalluni.

Thue Christiansen assilialiortutut kusanartuliortartutullu imminut ilinniartissimavoq. Eqqumiitsuliariaasia siamasissuuvoq, ukkusissamik ilusilersuinermiit qarasaasiakkut titartaanermut. Suliai nunani allani arlalinni saqqummersinneqarnikuupput.

Frimærkinik titartaasarpoq, nunatsinniittullu suliffeqarfiit atorfeqarfiillu ilisarnaasiuuttarlugit.

Allap sanaava nammineq suliarineragaq?

2006 oktobariugaa atuartartut ilaata AG-ikkut Thue Christiansen issuaasimasutut pasillereeraalu aviisitigut oqallittoqalerpoq. Allaaserinnittoq malillugu kalaallit erfalasuat qallunaat timersoqatigiiffiata Hjortshøj-Egå idrætsforeningiata immikkoortortaata HEI Rosportsip katinngataanut assut assinguvoq.

Siullermiilinngilaq erfalasut taakku marluk assigiinnerannik maluginninniarneq. Ukiut 20-t matuma siorna aamma oqallisigineqarsimapput. Tamatumunnga atatillugu oqalliseqataasup erseqqissarpaa nunap erfalasua ilisarnaatillu allat assigiissinnaanerat tupinnartuunngitsoq.

HEI Rosporti erfalasumut piginneqqaartussatut piumasaqarsimanngisaannarpoq.