Groenlandica

Groenlandica nunarput inuilu pillugit atuagaateqarfiuvoq.

Groenlandica nunatsinni, tamanit atuarneqarsinnaasunik saqqummersimasunik katersinikkut nalunaarsuinikkut toqqortaateqarnikkullu eriagisassatut kulturikkut kingornussassanik tammatsaaleeqataavoq. 

Atuakkat, atuagassiat, aviisit, allatullu naqinneqarsimasut, filmit, nipilersukkat, kalaallit atuakkiortuisa manuskriptii, nunap assigi assilisaalu Groenlandicamit Nunarput inuilu pillugit katersugaatilerisunit katersissorneqartarput, nalunaarsorneqartarlutik toqqortaateqarnerlu isumagisarlugu.

Tunniussisussaatitaanermut inatsimmi katersaateqarnissaq qulakkeerniarneqarpoq. Tunniussisussaatitaanermut peqqussut atuaruk. 

Ilisimatuussutsikkut katersugaatit atuakkanik, atuagassianik aamma nunanut issittunut tunngassuteqartunik nunatsinnilu inuiaqatigiinnut pingaaruteqartunik  katersugaateqarpoq.

Nunarput inuilu pillugit katersugaatit kiisalu ilisimatuussutsikkullu katersugaatit pillugit paasisarnerusinnaavutit.

Groenlandicap katersugaatai Ilisimatusarfimmiipput. Nunarput inuilu pillugit katersugaatit  isumannaatsumi toqqorsivimmiipput, immikkullu saniatigut Nunatta Atuagaateqarfiani inimi ikuallatsaalisami peqqumaateqarluta. 

Ilisimatuussutsikkut katersugaatit atuisunit tamanit ammanitsinni atorneqarsinnaapput.

Groenlandicap tunniunneqartut bibliotekskatalogimik pilersitsilluni atuakkap imarisaanik nassuiaalluni, atuakkap imaata allassimaffiinik nalunaarsuillunilu kalaallit oqaasiinut ujarliutinik katersisarpoq, ujaasiffiusinnaasumilu taakku ujarneqarsinnaapput. 

Ilisimatuussutsikkut katersugaatit tamanit atorniarneqarsinnaapput. Nunarput inuilu pillugit katersugaatit kopiivinik skannikkamilluunniit pisoqarsinnaavoq. Ammanitsinni atuagaateqarfimmi atuakkanik, aviisinik atuagassianillu atuartoqarsinnaavoq. 

Imminut sullississutikkut nammineerlutit atorniarsinnaavutit, utertitsillutit atukkannilluunniit sivitsuillutit.

Atuagaatilerisumut saaffiginnillutit atuisunngorsinnaavutit, sammisanut aalajangersimasunut ujaasinerni aalajangersimasumilluunniit ujaasinerni ikiorneqarsinnaallutit.

Groenlandicap ammanerani uunga alakkaasinnaavutit: Manutooq 1, 3905 Nuussuaq.

Busserniaruit Nuup Bussiisa angallassinerminni pilersaarutai uani takusinnaavatit.